Metrotalenta.online–
Dalam rapat beberapa tokoh Minangkabau, yang diadakan pada tanggal 25 Oktober 1912, disepakati tentang pembahagian harta pencarian dapat di berikan kepada anak -anaknya dan bukan kepada kamanakannya saja, begitu juga istri dan bahwa di bawah usia 17, 18 tahun tidak boleh menikah.
Siapa yang melanggar akan di hukum menurut adat.Pertimbangan dan keputusan rapat tersebut dimuat dalam Surat Kabar “Utusan Malajoe” Desember 1912 dengan catatan kritis D. S. Maharaja, yang menunjukkan watak yang lebih konservatif dan cinta adat.
Berikut Potongan tulisan dari “Utusan Malajoe” tersebut =
Pado patang Jumaat malam Sabtu 25 jalan 26 October 1912.
Duduak rapek pulo sagalo angku-angku tu mamparundingkan apo sajo nan bulieh di buek untuak „kamajuan nagari”.
Manuruik sapanjang katrangan „Tuanku Lareh Matua, patuik „harato pancarian” di barikan bakeh anak, supayo sianak bulieh tapaliharo dengan élok dek ibu bapaknjo sendiri, karano anak itu turunan bapak.
Dalam itu ado pulo angku-angku nan lain manunjuakkan pulo buah pikiran masing – masing lain dari itu banyak juo nan patuik di ubah adat nan lamo-lamo saparati „Babini” jan labiah dari „surang”; ado pulo yang mangatokan anak perampuan atau anak laki-laki jangan talampau ketek di kawinkan, sakurang -kurang umua anak itu „18 tahun” baharu bulieh di kawinkan, kalau anak itu akan dikawinkan, wajib kito tahu atau sianak itu manunjukkan, bahaso sabana-bana suko inyo kawin, kok anak tu laki-laki tantu bana sukonyo kapado parampuan nan akan jadi bininyo itu, ba’itu juo anak parampuan tantu bana handaknyo iyo suko kapado laki-laki nan akan jadi suaminjo itu, supayo parakawinan itu nak salamat, indak murah bacarai.
Mangko dalam parundingan iko di cari bana kato sapakat, dek sagalo angku -angku nan duduak rapék; dapeklah kato samupakat dan kaputusannyo bagimano nan tasabuik di bawah iko:
Harato pancarian bapak, patuik dibarikan bakeh „anak, indak bulieh dibarikan bakeh „kamanakan” sajo sababnyo:
I. Anak tu sudah tantu turunan bapak, dan darah daging dek bapak nyo
II. Anak itu wajib di paliharo dek bapak tidak patut akan di sio-siokan, dan di ajar dengan sabagimano dayo upayo bapak.
III. Indak patuik urang lain akan mamaliharo anak, sakalipun bapak tiri, dan mamaknyo, karano anak tu darah daging bapak. kok anak tu indak di paliharo bapak, hanyo tapaliharo dek urang lain, tantu sajo itu anak indak tapaliharo dengan sabanarnyo, karano indak darahnyo .
IV. Si Bapak sudah biaso dan lah tau bana, sajak si anak talahir ka Dunia „bapak juo nan mamaliharo dan mangatahuwi” sakit sanang dan elok buruak anak tu.
Manuruik sapanjang kato syara’, pancarian bapak wajib „untuk anak, indak haruih di barikan ka kamanakan”; batua juo bak mamang urang tuo-tuo:
” Kaluak paku kacang balimbing.
Aratinyo : anak dipangku kamanakan di bimbing makasuiknyo mamang itu: „Paralu anak, sunat bakeh kamanakan.
Parakaro „babini patoeik sa-urang kok ado angku-angku nan „babini” 2 – 3 tak usah di caraikan, malainkan wajib samo-samo di paliharo. tatapi kok sorang indak buliah di tambah, ba’itu juo kok „bini” berampe’ di sarai’ atau indak bulieh di ganti dan di tambah.
„Babini itu sasungguhnyo elok surang”, di sababkan =
1. Si Laki lah buliah bana mamaliharo bini dengan patoeik sakalipun ada anak.
2. Kabanyakan babini „duo tigo” itu tidak manuruik kaadilan sara’, karano tidak sampai manyampai dek si Laki, misalnyo: Kakuatan biaso ma angkek sapikua, kalau kito angkek 3—4 pikua tantulah tida takao; dan mano nan elok dan sanang, kalau kito biaso babalanjo f.1 sapakan di jadikan 3 – f.4 sapakan tantulah maraso enteng kito mangaluakan f.1 sapakan dari pado f.4 sapakan.
3. Urang babini duo tigo itu biaso io dapek panjakit, dari kakuatan „pakasih” nan di barikan bini, sadangkan „pakasiah”itu di bali pulo dengan harago dek bini kapado dukun-dukun, kadang-kadang „pakasih” nan di mintak bini, „Upeh (Ratjoen)” nan dapek dan di undjuak kannyo bakeh lakinyo.
4. Bini surang, ado pulo tasamporonokan dek laki, tantulah si bini itu hormat akan si laki dengan hiduik damai laki bini, kok barani tantu lah si laki dan si bini bahati-hati manjago dan mamaliharo anak dengan samporono.
Babini duo tigo itu tuan-tuan pambaco tantu lahmaklum pulo bagimano kasusahannyo; kabiasaan bini nan duo tigo itu indak bana sapakat, banjak kali bantahan nan mandatangkan hati tidak sanang.
Anak umua 17, 18 tahun baharu bulieh di kawinkan, baik laki-laki baik parampuan, jiko anak itu ba-umua 19 dan 20 tahun labiah, elok baru di kawinkan di sababkan:
1. Anak nan dibawah umua talampau mudo kalau dikawinkan, adalah marusakkan kapado kaduo balah pihak anak itu, turunannya kurang élok, sadangkan tanam tinaman peralu dicari tampang nan élok dan masak . nan élok akan dijadikan tampang, jangan disabuik mudo tinaman, nan di katokan mudo tinaman itu lah tantu indak elok bagitu juo mahanusia.
2. Kawin talampau ketek tu, tantulah kaduo laki bini lakeh rusak kapado kasihatan badan kaduonyo urang itu.
3. Lagi kaduo balah pihak urang tu, balum pulo pandai bana dalam ’adat laki bini.
Mancari tunangan anak tu laki-laki atau parampuan di turuik dan ditantukan bana sia bana nan di katujui anak tu, tahu bana handaknyo ibu bapaknyo sia nan di katujui anaknyo, kalau indak baitu tantulah akan taradjadi:
1. Pabauran anak itu jarang salamat, dangan murah carai sabab anak itu indak sabana cinto, dan sabana-bana suko, malainkan karano inyo takuik di bapak mandeh dan ninim-mamaknyo.
2. Kalau si laki-laki indak sabana cinto, murah carai, atau mancari bini nan lain.
3. Salamo-lamonyo pabauran itu indak damai, maalumlah urang tidak bakasukoan, kadang-kadang ado pulo nan manggabaji namonyo.
Apabilo parakawinan itu cinto samo cinto, dan suko samo suko, tak dapek tidak laki bini dapek damai sahio sakato, turuik manurui’kan; labieh-labieh kaduo laki bini urang ado pandai-pandai pulo.
Zaman kini bukan sudah ado satu duo urang bangso kito, baik laki-laki baik parampuan, nan alah pandai-pandai bapikieh karano sudah ado elmu kapandaian, tantulah akan mancari jodo itu inyo pandai, sia nan di katujuinjo.
Kalau anak-anak nan lah pandai itu, bapak mandeh dan mamak niniknyo, akan mancarikan jodo si anak itu, tentulah si anak itu bapikie: Pakarajaan bapak mandeh dan mamak ninik itu anianyo padanyo; sakalipun mau bapak mandeh dan mamak ninik tu di turuik dek si anak karano inyo takut, tantulah anak itu tidak sanang hati dangan sasahnyo.
Sagalo nan di parundingkan rapék di Batu Bangun tu, sakalian angku-anku tu lah bajanji, akan malakukan dan mambuwek conto dalam nagarinyo surang-surang miskipun pakarajaan angku-angku tu indak akan dituruik dek anak nagari, tatapi sabulieh-buliehnyo angku-angku tu akan maajak danmanjalankan dangan elok-elok bakeh Panghulu-Panghulu dan anak buah.
Barang siapo angku-angku tu nan malampaui parabuatan iko akan di hukum sapanjang adat:
– Salah nan paratamo, „satahie sapaho”, aratinyo „manguni nasi, manyinggang ayam, sirih nan balingka; dan dihimbau (di panggieh) sagalo angku-anku nan lah mupakat dalam iko.
– Salah nan kaduo kali: „Di potong Jawi „ditanak nasi sasampainyo”, di panggieh sagalo angku-angku nan turuik rapék iko, dan sagalo balanjo angku-angku nan datang tu di tanggung dek nan salah tu./Minangkabau.
Dikarangkan oléh kami :
Orang Kayo Bandaharo.
P. K. Gasan Gadang.
DATOEK NAN CHADOH.
P. K. Lawan.
Imam Bandaro Kayo.
Controle mantri Kuranji
****************
* Sumber = ADATRECHTBUNDELS – XXVII: SUMATRA, 1928
* Foto sebagai ilustrasi = www. gambarkeren.
* Penulis = Marjafri
